एक माराज का आसरम में एक चेलो केवे के करम करे वो मोटो वेवे जतरे दुजो चेलो क्यो के कोइने भाग मोटो वेवे। माराज बी होच्यो के अबे यांको फेसलो करणो पेड़ी माराज वांने क्यो के काले आज्यो पाचा। माराज दूजे दन दोई चेला ने एक च्यारूँ मेरऊँ बन्द घर में लेजान बन्द कर नाक्या। अन क्यो के काले ध्यान पड़जई। दोई जणा घर में जान बेटग्या हा जतरे करम करबा वाळे चेले क्यो के यार ईं घर में हामाळाँ तो खरी ज्यो आपांने कई खाबा ने मल जावे। जतरे दूजे भाग वाळे चेले क्यो के आपणे तो भाग में वेई तो अटेई मलजई। एक चेलो हामाळबा लागो वींने एक खोटी नजर लादी वीं में वींने चणा भरिया तका लाद्या हा। वीं दूजा चेला ने क्यो के मने तो मारे खाबा को मलग्यो कांकी में करम किदो हो वींको फळ मल ग्यो मने तो चणा मल्या अन ये काँकरा बी ईंमे हे ज्याने थूँ खाजा थारा भाग में तो भाटाइस लिक्या तका हे। वे भाटा वींने दे दिदा हा दूजे दन माराज दोयां ने बुलाया अन देके तो भाग ने मोटो बतबा वाळा चेला का हात में हिरा हा वीं क्यो के मारा भाग में तो ये हिरा हा ज्यो मने आपों आप आन मल्या अन ईंका करमाऊँ मने ये हिरा मल्या ईं बाते भाग अन करम दोई एक दूजा बना अदूरा है।
