एक दाण ती बोपारी एक राजा का राज में ग्या हा, वे राजा ने जान क्यो के हजूर माने आपका राज में लूट लिदा माका आपका राज में बोपार करबा ने आया हा। राजा वां बोपारियाँ की बात हुणन क्यो के थाँने मारा राज में लूट लुदा हे तो थाँकी अबकई में मूँ थाँकी मदत करूँ। राजा वांने एक-एक गवाँ की बोरी दिदी ही अन क्यो के मूँ थाने या गवाँ की बोरी देरियूँ हूँ काँ के थाने मारा राज में लुट नाक्या ईं बाते ईं बोरीऊँ रो गऊँ होजा करन खाज्यो अन एक मीना केड़े पाचा आज्यो। बोपारियाँ देक्यो के योकस्यो नेम हे। पण राजा का हामे कुण जावे, वे तीनी वाँका ठाणे परा ग्या हा। तीनी जणा आपणी-आपणी बोरीऊँ एक दन धान निकाळ्यो अन होजो करन पीसान खादो हो। पण वां तीनाऊँ दो जणा तो एक दन धान होजो किदो हो अन दूजा धान ने चक्की वाळा ने लेजान दे दिदो हो अन एक जणो रोज वां गवाँ ने होजा करतो हो अन रो पीसान खातो हो। एक मीनो व्यो अन वे दोई जणा तो आरामऊँ रया अन वीं के मीनो व्यो अन बोरी खाली वेगी ही पण वीं बोरी का मीनूँ एक हीरो निकळ्यो हो वो मनक वीं हीरा ने होनार नके तरासबा ने दे दिदो हो। एक मीना केड़े वे तीनी बोपारी राजा नके ग्या हा। दो बोपारी तो गवाँ ने चक्की वाळा ने दिदा ज्या बात राजा ने बता नाकी ही पण वो तीजो बोपारी वाँ राजा ने एक हीरो दिदो हो। राजा वीं बोपारी ने क्यो यो हीरो थारेइस राक अन ईंऊँ थारो बोपार चालू कर नाक अन वां दोई बोपारियाँ ने क्यो के अस्यान थाँकी बोरियाँ में बी एक-एक हीरो हो पण थाँ आळसी हो ईं बाते वो हीरो थाने ने मल्यो अन यो मेनती हो ज्यो ईंने वो हीरो मल ग्यो। अबे थाँ जावो अन दानकी करन पेट भरो। ईं बाते मनक ने ज्यो काम भळा नाके वीं काम ने करबाऊँ मनक होरो रेवे।
